اسكتش ( رحلة البحث عن المسيح القائم )

استعرض الموضوع السابق استعرض الموضوع التالي اذهب الى الأسفل

اسكتش ( رحلة البحث عن المسيح القائم )

مُساهمة  نانسى ديفيد 1 في الأربعاء أبريل 28, 2010 3:01 pm

فهمان : صباح الخير يااصحابى معلش مش هقدر اتكلم معاكو كتير , اصل انا مستعجل الميس بتاعتى طلبت مننا بحث مهم جدا عن . عن . اة . عن ( اكبر كسوف للشمس ) انا هدخل النت وادور علية .
النت هنا بيقول ان اطول كسوف للشمس كان فى وقت صلب السيد المسيح على الصليب , ياسلام لو اروح عند المسيح وهو مصلوب علشانى واقولة سامحنى , وكمان فرصة اشوف كسوف الشمس واعرف هى عملت كدة لية ؟
اية دا دا مكتوب عل النت انى ممكن اسافر لزمن صلب السيد المسيح عن طريق الة الزمن الله لما اروح اجهز شنطة الرحلة واسافر مع اصحابى بسرعة .
الشمس : اهلا بيكو يااصحابى انا مبسوطة لانكم جيتو لحد عندى تعرفوا سر كسوف النور بتاعى .
فهمان : انا واصحابى ياشمس عاملين رحلة علشان نعمل بحث مهم عن سبب كسوف الشمس عندك وقت صلب المسيح ممكن تساعدينا .
الشمس : طبعا هساعدكو
فهمان : انا لما دورت وبحثت فى النت عن سبب كسوف الشمس النت قالى من الموسوعة
الشمس : انا اقولك سبب كسوفى السبب ( هو ان القمر بيعدى من قدامى فيختفى نورى بس دا بيبقى لمدة دقيقة او دقيقتين او تلاتة بالكتير بس ماقعدش من غير نور 3 ساعات )
فهمان : طب احكلنا ياشمس عن سبب يخلى نورك يختفى من العالم كلة لمدة 3 ساعات ؟
الشمس : انا هحكلكم اللى حصل كان لازم اخفى نورى عن العالم كلة لانى مقدرش اشوف اللى خالقنى وخالق الكون كلة مصلوب على خشبة الصليب . دا كمان كان فى ناس بتقول حاجات عنة مش حلوة علشان كدة كان لازم اضلم العالم كلة واخفى نورى عنهم مدة طويلة طول ماحبيبى يسوع مصلوب على الصليب .
فهمان : متشكر جدا ياشمس على المعلومات المفيدة دى , انا عرفت حل البحث بتاعى انا واصحابى بس ياترى ممكن نلاقى المسيح فين دلوقتى .
الشمس : انا عرفت ان الجنود اخدوة علشان يصلبوة على خشبة الصليب ممكن تروح للصليب واسالة علية ؟ وقولهم ان الشمس مش هتنور طول ماحبيبها على الصليب .
فهمان : يالا ياصحابى نبتدى دلوقتى رحلة البحث عن المسيح المصلوب كلة يجمع هنا هنروح ندور على الصليب ياترى ممكن نلاقي الصليب فين ؟ وممكن نلاقي المسيح علية ولا اية ؟ يالا بينا .
اخيرا وصلنا كلة يقف هنا لحد مانسال الصليب ياصليب ياصليب الشمس بعدتنا لحد عندك علشان نسالك هو المسيح المصلوب شفتة ولا ماشفتهوش ؟
الصليب : ايوة المسيح كان مصلوب عليا بس جم اتنين نزلوة من عليا بعد مامات .
فهمان : المسيح مات وهو عليك, طب ممكن تقولنا هو اية اللى حصل بالظبط .
الصليب : طبعا ممكن احكى ليكم عن اللى حصل لانة اللى حصل كان شى عجيب جدا !!! انا مرة واحدة لقيت صوت جنود وحراس جايين ياخدوا من الشجرة اللى انا فيها خشب وسمعت انهم عاوزين الخشب يعملوا منة صليب علشان يصلبوا علية حد واخدونى وعملونى صليب بس انا كان نفسى اتعمل سرير ولا كرسى كان احسن بكتير من انهم يعملونى صليب .
فهمان : وانت مش عاوز تتعمل صليب لية ياصليب ؟
الصليب : لان زمان كان الصليب بيسموة صليب العار واللى بيتصلب علية كان بيكون عامل حاجات كلها لاتليق فكانوا ياخدوة ويصلبوة على الصليب بس دا كان زمان قبل مايجى المسيح ويتصلب عليا .
فهمان : طيب واية اللى اتغير فيك ياصليب مانت صليب زى مانت ماتغيرتش فى حاجة
الصليب : لا المسيح غيرنى , انا سمعت اصوات ناس بتهتف وبتقول اصلبوة اصلبوة بصوت عالى جدا وصلبوا المسيح عليا انا عرفت ان المصلوب عليا بار جدا وماعملشى اى خطية زى بقية المصلوبين دا سبب خلانى اكون مبسوط لانى مميز عن كل الصلبان .
فهمان : طيب اسمك اللى مزعلك صليب العار ؟
الصليب : المسيح المخلص لما اتصلب عليا غير اسمى من صليب العار لصليب النصرة والخلاص والفخر .
فهمان : طيب انت عندك خشبة بالطول وخشبة بالعرض ياترى دى معناهم اية بعد مالمسيح اتصلب عليك ؟
الصليب : زمان قبل مالمسيح يتصلب عليا ماكنشى ليهم اى معنى بس بعد الصلب بقى ليهم معنى الخشبة اللى بالطول معناها ان المسيح صالح السماء بالارض واى حد هينتقل او هيموت علطول هيطلع للسماء ودا ماكنشى بيحصل قبل نزول المسيح وصلبة .
اما الخشبة اللى بالعرض اللى هى دى معناها ان المسيح نقلنا من الضلمة للنور, من الشمال الى اليمين, من الضعف الى النصرة .
فهمان : طيب انت تعرف سبب ان المسيح مصلوب فاتح ايدية ؟
الصليب : طبعا اعرف عاوز يقول للكل انا مسامحكم وكلكم جوة قلبى وواخدكم فى احضانى .
فهمان : طيب معلش احنا طولنا عليك فى الاسئلة ياصليب بس عندى سوال تانى, انت اية اللى سمعتة تانى والمسيح عليك ؟
الصليب : سمعت المسيح بيوصى يوحنا الحبيب على العدراء بيقولة خد بالك منها وحبها واحترمها زى امك زى ماكنت انا بحبها و بحترمها وبسمع كلامها ,
ووصى العدراء على يوحنا الحبيب وقالها دا ابنك خلى بالك منة لانك هتبقى زى امة حفظى علية وحبية زى ماكنتى بتحبينى بالظبط .
فهمان : ياسلام السيد المسيح حب يطمن على كل اهلة قبل مايموت على الصليب ات اية انت عظيم وحنون يارب علينا .
الصليب : الغريب مش انة اطمن على اهلة وبس لا دا كان بيطمن على كل الناس حتى اللى دايقوة ومسكوة وحطوة على الصليب سامحهم وقال لابوة اللى فى السماء سامحهم يارب لانهم لايعلمون ماذا يفعلون .
فهمان : ياسلام بعد دا كلة المسيح يطلب ليهم من ابوة السماوى انة يسامحهم ات اية ربنا حنين علينا جدا .سمعت اية تانى بقى ؟
الصليب : سمعت كلام مهم حصل ووعود وعدها المسيح لحد على الصليب سمعت اللص الشمال اعد يتريق ويقول للمسيح مش انت فتحت عنين الاعمى طيب نزلنا من الصليب . بس رد علية صاحبة وقالة اسكت احنا نستاهل نبقى هنا بس هو لا لا لانة بار جدا وماعملشى حاجة يستاهل عليها الصلب فطلب من المسيح وقالة يارب اذكرنى متى جئت فى ملكوتك , سمعت المسيح رد علية وقالة اليوم تكون معى فى الفردوس .
وبعد تعب العذاب المسيح تمم خطتة ومات وجم اتنين طيبين اوى وخدوة .
فهمان : طيب انت ماتعرفش اساميهم اية ياصليب ؟
الصليب : انا سمعتهم بيكلموا بعض وبيقولوا واحد اسمة يوسف الرامى والتانى اسمة نيقوديموس . ياريت اكون قدرت اساعدكو بالمعلومات وتعرفوا مكان المخلص .
فهمان : طبعا ساعدنا ياصليب وكل كلامك كان مفيد احنا بنشكرك وبنستاذن منك نلحق ندور على يوسف الرامى ونيقوديموس بس ممكن نسال اخر سوال وهنمشى علطول . هو يوسف ونيقوديموس كانوا ناس طيبين وعرفوا ينزلوا المسيح من عليك باذن من مين ؟؟؟
الصليب : انا عرفت الاتنين دولة من ناس كان بيقولوا عليهم انهم طييبن اوى واغنياء جدا جدا جدا وليهم كلمة مسموعة فى البلد عند بيلاطس اللى حاكم المسيح اما باقى المعلومات هتعرفوها لما تلاقوا نيقوديموس او يوسف الرامى .
فهمان : لا لحد هنا وشكرا لمساعدتك ياصليب يالا ياصحابى كلنا نقول للصليب باى ويالا نركب الة الزمن وندور على الاتنين يوسف الرامى ومين نيقوديموس يالا بينا .
بس هنا انا شايف واحد واقف ياترى دا انهى واحد فيهم يوسف ولا نيقوديموس لما اسال لو سمحت انا واصحابى كنا جايين نعمل رحلة وندور عن المسيح المصلوب انت شفتة الصليب قالنا ان فى اتنين نزلوة بس بامر من مين مش عارفين .
نيقوديموس : اهلا بيك فهمان انا نيقوديموس وانا اللى نزلت المسيح المصلوب من على الصليب انا وصاحبى يوسف الرامى .
فهمان : طيب ممكن نفهم انتوا اخدوا اذن من مين انكم تنزلوة و تاخدوة طيب حطيتوة فين ؟
نيقوديموس : الاول احب اعرفك بنفسى انا اسمى نيقوديموس رجل غنى جدا انا وصاحبى يوسف وكنا من تلاميذ المسيح بس محدش كان يعرف دا, كان فى السر , دا كان بنا وبين المسيح هس هس وكنا عارفين انة المسيح دا الالة الحقيقى فطلبنا من بيلاطس انة ياذن لينا اننا ناخدة معانا علشان نكفنة بالاقمشة ونحطلة الحنوط فوافق بيلاطس رحنا جرى اخدنا الحنوط والاكفان ونزلناة من على الصليب وكفناة
فهمان : اية دا انا فاكر انة هو معاكو دلوقتى .
نيقوديموس : لا يافهمان المسيح كان معانا صح بس هو دلوقتى مدفون فى قبر جديد خالص محدش اندفن فية قبل كدة بس واحنا جوة القبر بنحطة حصلت حاجة غريبة وعجيبة جدا ليا انا ويوسف الرامى
فهمان : خير اية اللى حصل وانتم بتدفنوا المسيح جوة القبر الجديد .
نيقوديموس : من كتر ماكنا زعلانين على المسيح وعلى موتة قولنا ازاى الهنا خالق الكل اللى فتح عين الاعمى واللى قوم الموتى يموت , ازاى واهب الحياة وخالق الكون يموت ؟
وفجاة سمعنا صوت ملائكة بترتل وتسبح بتقول قدوس الله قدوس القوى قدوس الحى الذى لا يموت .
فهمان : انا عارف اللحن دا انا واصحابى بنقولة فى القداس بنقول اجيوس ولما سالنا الاستاذ عن معنى الكلام دا فى اللحن قالنا معناة ان ربنا كامل القداسة وقدوس للقديسين ياة ربنا عظيم اللى بيخلينا نشترك فى التسابيح مع الملائكة ونحس اننا طلعنا فى السماء نسبح رب المجد .
نيقوديموس : دا كمان فى نبوءات العهد القديم زمان كان مكتوب فى اشعياء النبى ( قدوس الله قدوس القوى قدوس الحى الذى لا يموت )
فهمان : قصدك يعنى الناس الكويسة اللى زى اشعياء ربنا اداها نعمة تعرف اية اللى هيتقال بعد كدة زى اللحن دا .
نيقوديموس : ايوة يافهمان وكانت النبوات بتكمل بعضها لحد مامات المسيح على الصليب .
فهمان : انا متشكر خالص يانيقوديموس انك حكتلنا وساعدنا اننا نلاقى المسيح المصلوب بس ممكن تدينا عنوان القبر الجديد اللى المسيح اتصلب فية ؟
نيقوديموس : طبعا انا عارف مكانة اتفضلوا العنوان .
فهمان : يالا ياصحابى نركب بسرعة انا معايا عنوان القبر الجديد اللى اندفن فية المسيح نقول باى لنيقوديموس باىىى
اخيرا وصلنا لمكان القبر هو انهى واحد من دول اة اهة تعالوا لما نروحلة ونشوف المسيح موجود ولا فين .
ياقبر ممكن نعرف المسيح المصلوب عندك ولا لا ؟ نيقوديموس قالنا انة دفنة هنا عندك ؟
القبر : اهلا وسهلا بيكو هو كان هنا بس دلوقتى هو مش موجود فيا .
فهمان : ازاى الكلام دا ياقبر اتاكد المسيح جوة عندك ولا لا .
القبر : المسيح المصلوب مش فيا هو الاول يوسف ونيقوديموس جابوة وحطوة جوايا دلوقتى هو مش فيا .
فهمان : ياخبر احنا افتكرنا اننا وصلنالة خلاص طيب ممكن تقولنا بعد مانيقوديموس ويوسف الرامى كفنوة وحطولة الحنوط راح فين وازاى يخرج وهو ميت وملفوف ممكن تجاوب على اسئلتنا ياقبر ؟
القبر : حاضر سوال سوال بالراحة الاول انا سمعت صوت اتنين عرفت انهم نيقوديموس ويوسف وجايين يدفنوا واحد اسمة المسيح جوايا انا استغربت لانى قبر جديد ومحدش ادفن فيا قبل كدة يبقى لازم المسيح دا غالى اوى عليهم وحطوة ومشيوا وسابوة جوايا وحصلت حاجات عجيب جدا على القبر بتاعى يافهمان .
فهمان : حاجات عجيبة زى اية مثلا ياقبر .
القبر : مثلا فى حراس جابوا حجر كبير جدا جدا وقفلوا عليا وكمان جابوا ختم وختمونى بية انا استغربت لان كل القبور ماحصلش فيهم كدة زيى والاغرب بقى يافهمان ان فى حراس كانت اعدة بتحرس اللى جوايا طول الليل وكانوا مفتحين عنيهم ومانعين حد يقرب منى انا او من اللى مدفون جوايا اللى هو المسيح .
فهمان : عندك حق تستغرب ياقبر بس ياترى انت عرفت هما بيعملوا دا كلة لية ؟
القبر : عرفت طبعا عرفت ان اللى اتصلب دا بار واسمة المسيح وكمان عرفت ان كل الطبيعة اتهزت لما اتصلب ومات , حتى انا القبر لما دخل جوايا واندفن لقيت مرة واحدة نور شديد خالص منور القبر مع ان القبر مافهوش نور من الاول .
فهمان : ها واية تانى ياقبر عرفتة ؟
القبر : المفروض انى زى اى قبر بيدخل فية اى انسان ميت لازم جسمة يتحلل ويطلع ريحة مش حلوة منة بس المسيح خلى ريحة القبر بتاعى جميل خالص مليان بالاطياب .فعرفت انى مميز عن بقية القبور لان المسيح اندفن فيا انا .
فهمان : طيب سوال انت بتقول وقفوا قدام الباب بتاعك حراس كتير خالص ومنعوا حد يقرب منك او منة وهو مدفون هما لية كانوا خايفين مع ان المسيح خلاص مات وهو على الصليب هو فى حد يخاف من حد مات خلاص ؟
القبر : عندك حق انا زيك استغربت وقلت دا مات خلاص خايفين من اية تانى بس انا عرفت من نيقوديموس وهو واقف بيكفن المسيح ان المسيح حى بس ازاى ماعرفش المفروض اللى بيدفن فيا يبقى ميت انت تعرف اجابة السوال دا يافهمان ازاى المسيح مات على الصليب واندفن فيا والحراس خايفين منة ويوسف بيقول ان المسيح حى ؟
فهمان : انا هقولك دى خدناها فى الكنيسة وبنقولها مع ابونا فى القداس علشان المسيح لاهوتة لم يفارق ناسوتة ولا لحظة واحدة ولا غمضة عين .
القبر : اها انا كدة فهمت كلام نيقوديموس وكمان يوسف شكرا يافهمان .
فهمان : العفو بس ممكن تقولى لما القبر نور نور عظيم اية اللى حصل ؟
القبر : لقيت ان المسيح قام من بين الاموات وعرفت دا من الاكفان اللى كان ملفوف بيها والاطياب اللى كان علية لقيت كل حاجة مطبقة ومحطوطة بنظام عرفت انة قام من الاموات . ولقيت الحراس خافوا جدا جدا من النور الشديد وراحوا جريوا بسرعة .
فهمان : طيب لما المسيح دخل فيك ياقبر محدش جة يطمن او يزور المسيح جوة القبر ؟
القبر : لا جة طبعا المريمات علشان يحطوا للمسيح الاطياب بس لما دخلوا القبر لقيوا اللى اعد فيا مش المسيح
فهمان : امال مين قول بسرعة .
القبر : اللى كان اعد فيا كان ملاكين منورين بعد قيامة المسيح واحد مكان راس المسيح والتانى عند مكان رجلية .
فهمان : طيب المريمات سالوا الملاكين ؟
القبر : طبعا قالولهم السيد فين ؟ رد الملاكين وقالولهم انتوا لية جايين هنا تسالوا عن المسيح هو عايش وقام من الاموات روحوا بسرعة فرحوا اخواتكم التلاميذ بقيامة المخلص وجريوا المريمات يقولوا للكل على اللى شافوة وهما جوايا .
فهمان : طيب انا كمان بسال المسيح راح فين ؟
القبر : دلوقتى اقدر اقولك اسالوا المريمات هما يعرفوا الاجابة .
فهمان : شكرا ليك ياقبر وشكرا على مساعدتك لينا يالا بينا اصحابى ندور على المريمات باى ياقبر باى كلة يركب بسرعة .
اهة مريم كلة يقف يالا هس عاوزين نسالها عن المسيح القائم من بين الاموات . مريم انت شوفتى المسيح القائم من بين الاموات احنا عمالين ندور علية من بداية الرحلة والقبر بعدنا ليكى نسالك ؟
مريم : انا فعلا شفتة روحت انا والمريمات يوم الاحد فى الفجر وكان معانا الاطياب ودخلنا القبر ملقتش الجسد وببص لقينا ملاك بيقول عاوزة مين ؟
فهمان : ها وبعدين قولتيلة اية ؟
مريم : قلتلة عاوزة سيدى المصلوب على الصليب واللى اندفن هنا فى القبر الجديد رد وقالى هو مش هنا هو قام من بين الاموات زى ماقال المخلص ليكو قبل صلبة ففرحت جدا ومشيت وانا فرحانة علشان اقول للتلاميذ وافرحهم زى مانا فرحانة .
فهمان : ها وبعدين اية اللى حصل تانى ؟
مريم : وانا ماشية فى الطريق فرحانة سمعت اليهود بيقولوا انهم سرقوا جسد يسوع مع انهم كانوا حطين على القبر حراس كتير مش معقول ان فى حد هيسحب الحجر ويسرقة والحراس مش هيشوفوة .
فهمان : طيب مش انت الملاك قالك انة قام انتى لية ماصدقتهوش وشكيتى فى كلامة لما سمعتى كلام الحراس؟
مريم : انا شكيت انة ممكن يتسرق فرجعت تانى للقبر وانا ببكى بالدموع وببص ورايا لقيت يسوع بس فى الاول ماعرفتهوش
فهمان : لية ماعرفتهوش مش انتى كنتى معاة دائما فى كل مكان انتى والمريمات ؟
مريم : لانى ساعتها كنت حزينة جدا فافتكرت اللى واقف دا البستانى اللى بياخد بالة من الزرع بتاع جنينة القبر, لان مين هيكون موجود فى الوقت دا فى القبر غيرة فقولتلة لو كنت انت اللى اخدة وحطيتة فى مكان تانى قولى وانا اروح اجيبة وبعدين يسوع بص لى بحنان وقالى ( يامريم ) فاتفتحت عينى وقلبى وافتكرتة , زمان كان لما يحب ينادينى كان يقولى مريم فقولتلة ( ربونى ) !!!! يعنى يامعلم من فرحتى رحت المسة .
فهمان : ها وبعدين هو رد عليكى ولا سكت قولى يامريم بسرعة
مريم : رد عليا وقالى لا تلمسينى لانى لم اصعد لانى كنت شكة انة قام وصدقت كلام الحرس ورحت اتاكد , كمان قالى روحى بسرعة قولى لاخواتى انى قمت من بين الاموات فجريت بسرعة علشان اقول للتلاميذ ان السيد المسيح قام من بين الاموات وبقيت متاكدة وببشر وبقول لكل الناس ان المسيح قام من بين الاموات بالحقيقة قام .

فهمان : عظيم وعجيب هى اعمالك يارب اتصممت خطة الخلاص واتنفذت من اجلنا يامخلص اخريستوس انستى اليسوس انستى ..... المسيح قام ................بالحقيقة قام .

نانسى ديفيد 1
ملاك جديد
ملاك جديد

المساهمات : 10
تاريخ التسجيل : 27/04/2010

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى