مسرحية الفداء ( فادى ومفدية )

استعرض الموضوع السابق استعرض الموضوع التالي اذهب الى الأسفل

مسرحية الفداء ( فادى ومفدية )

مُساهمة  نانسى ديفيد 1 في الأربعاء أبريل 28, 2010 3:34 pm

لراوى : ازيكو با اصحابي عاملين اية كويسين يارب دائما انا جي النهادرة مش عشان انا هتكلم لا ,
النهادرة هنسمع ونشوف حكاية حلوة اوى تعالوا معايا .
فلفـل : اية دا فلفلة لسة بتطلع علي الشجرة بتاعتي يا سلام انا فرحان اوى كل فلفلة تطلع وتكبر عندى ببقى مبسوط وفخور بيها اوى , يا سلام دى جميلة اوى وصغيرة خالص انا هسميها فلفلة ايوة , فلفلة حبيبتى يالا اصحي .
فلفلـة: اة اوم ( تعمل حركات كانها بتصحي ) صباح الخير انت مين .
فلفـل : انا فلفل المسئول عن الشجرة باللي فيها وانتي فلفلة صغيرة لسة طلعة علي الشجرة بتاعتي وأنا مبسوط بيكي اوى , كمان أنا المسئول اني اعلمك كل شئ وكمان اعرفك علي كل شئ هنا . وهبقي معاكى لحظة بلحظة ومش هسيبك أبداً اطمني .
فلفلـة: أنت طيب اوى يافلفل وكمان انا حبيتك ممكن نبقي اصحاب من النهادرة .
فلفـل : طبعا ممكن دا انا هبقي مبسوط اوى يا فلفلة , بس يا فلفلة انتي لازم تخدى بالك من حاجة مهمة اوى .
فلفلـة: من اية يا فلفل طمني .
فلفـل : طول ما انتي علي الشجرة هتبقي في امان وبعيدة عن اى شئ يتعبك أو يدخلك في مشاكل .
فلفلـة: مشاكل زى اية مثلا ! وكمان مين دا اللي يقدر يوقعني في المشاكل .
فلفـل : ايوة يا فلفلة لو بعدتي عن الشجرة ونزلتي علي الأرض ممكن الدودة تضحك عليكي لحد ما تنزلك من الشجرة وبعد كدة تاكلك , عرفتي بقي أنا لية نصحتك وقولتلك من دلوقتى علشان تعرفي مين اللي بيحبك ومين عاوز يوقعك .
فلفلـة: خلاص يا فلفل أنا بوعدك ان مهما حصل مش هنزل من الشجرة أبداً وهفضل معاك علي طول ماسكة في أيدك
فلفـل : وأنا عيني هتبقي عليكي علي طول وبايديا هتبقي محوطاكي .
فلفلـة: فلفل فلفل حبيبي ممكن أسالك سؤال ؟
فلفلـل : اتفضلي أسالي زى ما انتي عاوزة .
فلفلـة: أنا كنت عاوزة أعرف لو مثلا مثلا وقعت علي الأرض والدودة قربت مني هتسبني وهتنساني ومش هتسال عليا من تاني !
فلفـل : عمري ما هسيبك يا فلفلة أبداً مهما حصل ليكي , هفضل طول عمري فكرك وعيني عليكي وهنقذك لما تناديني وهتلاقينى دائما في وقت الشدة معاكي .
فلفلـة: طب أنا هروح دلوقتى العب شوية علي ورق الشجر باي يا فلفل .
الدودة : يا سلام اخيرا فلفلة بقت لوحدها كان نفسي في دا من زمان دلوقتي فلفل مش شايفنا لما أورح بسرعة بقي أكلم مع فلفلة قبل ما فلفل يجلنا هاهاها . فلفلة فلفلة .
فلفلـة: ايوة مين مين اللي بينادى عليا !
( 2 )
الدودة : أنا أنا الدودة صاحبتك الجديدة .
فلفلـة: صاحبتي بس فلفل قالي اني ما اصاحبشي الدودة علشان انتي ممكن تضحكي عليا وتنزليني من علي الشجرة .
الدودة : أنا معقولة , أنا اعمل كدة في صاحبتي الجديدة طب وأنا اعمل كدة لية .
فلفلـة: أيوة فلفل قالي علشان لما هنزل علي الأرض هتاخديني وهتبعديني عن اللي بحبهم وبعد كدة تاكليني .
الدودة : مين اللي قالك كدة يا فلفلة دا أنا بحبك وبخاف عليكي كمان .
فلفلـة: فلفل هو اللي قالي كدة وكمان نصح كل اللي علي الشجرة علشان هو بيحبنا .
الدودة : هاها لا طبعا فلفل قالكم كدة علشان ما حدش يشوف جمال الأرض واللي موجود عليها وأنكم تفضلوا كدة يا عيني علي طول علي الشجرة شايفة شايفة يافلفلة الحيوانات اللي بتلعب علي الأرض شايفة الفراشات الملونة اد اية هي جميلة خالص شايفة هي بطير ازاى ولا الأرض الواسعة مش حتة شجرة صغيرة مش عارفة تقفي فيها براحتك من الورق اللي فيها .
فلفلـة: بس لو نزلت مش هعرف اطلع تاني علي الشجرة كمان أنا وعد فلفل اني اسمع كلامة ومش هزعلة أبداً مني.
الدودة : ومين قالك ان فلفل هيزعل منك وكمان مين اللي هيقلة انك نزلتي أساسا انتي هتلعبي شوية صغيرين مع الفراشات الحلوين الملونين وكمان هتتفرجي علي كل حاجة انتي ما شفتهاش قبل كدة وبعد كدة تطلعي تاني علي الشجرة وبكد انتي اتفرجتي واستمتعي وكمان ترجعي في مكانك علي الشجرة زى الأول ها أية رأيك قولتي أية !
فلفلـة: طب ممكن أروح استاذن من فلفل أنا مش متعودة اني أعمل حاجة من غير ما اخذ اذنه وكمان علشان يعرف مكاني !
الدودة : أوعي أوعي تعملي كدة يا فلفلة علشان لو فلفل عرف هيرفض علشان ما يخلكيش مبسوطة زينا يا لابسرعة قبل ما حد يشوفنا .
فلفلـة: عندك حق يادودة أنا من زمان كان نفسي أشوف الأرض وأنزل والعب فيها وكل مرة فلفل يقولي أنا مش عاوز حد يزعلك لما تنزلي علشان كدة دائما كان مخليني هنا علي الشجرة بس أنا نفسي أنزل والعب , خلاص يادودة أنا قررت اني انزل معاكي بس يادودة علشان خاطرى رجعيني علي الشجرة بدري قبل ما فلفل يجي ويسأل عني توعديني بكدة يادودة ؟!
الدودة : طبعا طبعا أوعدك يافلفلة .
فلفلـة: بس بس انا هنزل من الشجرة ازاى ؟
الدودة : دى حاجة سهلة اوى اتمرجحي انتي جامد اوى اوى من علي الفرع بتاعك ولا مبتعرفيش تتمرجحي ؟ ولا يمكن تكوني لسة صغيرة ولا حاجة !
فلفلـة: لا لا اعرف طبعا يعني هاخسر اية حتي شوفي .
الراوى : ولما فلفلة بتتمرجح جامد اوى افتكرت حاجة كان فلفل قايلهلها .
من هنا تعمل فلفلة فلاش باك لفلفل
فلفـل : فلفلة حبيبتي حسبي من حاجة! اوعي تتمرجحي علي الفرع جامد علشان ممكن تقعي من عليه ولما تقعي ممكن تتعوري والدودة تيجي وتاخدك مني .
فلفلـة: بس أنا نفسي انزل ولو شوية صغيرين أنا أسفة يا فلفل ياحبيبي . ( ترجع تكلم نفسها بعد ما تفتكر ) .
( 3 )

الدودة : جامد اكتر اكتر يا فلفلة شاطرة .
فلفلـة: بس أنا أول مرة أخاف كدة يادودة أنا خايفة اةةةةةةةةةةةةةةةةةةةةةةةةةةةةةةةةةةةةةةةة .
فلفـل : ياة يافلفلة بردة خليتي الدودة تضحك عليكي وتنزلك من علي الشجرة مع اني نصحتك وقلتلك اية اللي ممكن يحصلك لما تبعدى عني كان نفسك تشوفي الأرض باللي فيها, كان نفسك تلعبي مع الفراشات الملونة ,بس كل دا كان معمول من الدودة علشان توقعك علي الأرض لونتك كل حاجة بالالوان علشان تبعدى عني وهو دا اللي حصل بس لازم تجربي بنفسك الطريق اللي انتي اخترتيه يافلفلة .
فلفلـة: ها يالا بقي علشان نلعب مع الفراشات الحلوة الملونة اللي بطير هي صحيح راحت فين يا دودة يا صاحبتي .
الدودة : صاحبتك هاهاها كل اللي انت كنتي شيفاة من فوق علي الشجرة أنا عملتة علشان اضحك عليكي وانزلك من عليها وأنا دلوقتي اللي كسبت .
فلفلـة: يعني اية! ضحكتي عليا زى ما فلفل قالي بس انتي وعدتني اننا هنطلع تاني علي الشجرة .
الدودة : وعد بس انا مابو عدش حد ولو وعد حد ما نفذشي وعدى هاها مع ان فلفل نصحك مني
بس عرفت اضحك عليكي وانزلك من علي الشجرة . ودلوقتي انتي لوحدك من غير فلفل
حبيبك لان لو فلفل كان لسة معاكي ماكنتش هاعرف اعمل اى حاجة ليكي . ودى فرصتي دلوقتي .
فلفلـة: يارتني كنت سمعت كلام فلفل حبيبي هو الوحيد اللي بيحبني هنا , هو الوحيد اللي نصحني ويارتني كنت سمعت كلامة افتكرت انه مش عاوزني اشوف واتمتع بالحاجات اللي حواليا طلع انه عارف ان الحاجات دى الوان وبس, الحقيقة هو اني أكون علي الشجرة وأكون معاه ؟ أعمل أية ؟
الدودة : يالا بقي يافلفلة ياجميلة علشان ادخل فيكي واكلك هم المم .
فلفـل : أنا لازم أنزل الأرض وانقذ فلفلة ايوة انا وعدها انها مش هتتالم أبداً طول ما انا موجود وعدها انها هتفضل عايشة في سلام ايوة انا هنزل بنفسي باختياري مش غصب عني كل دا علشان فلفلة حبيبتي ..
الدودة : يا عيني عليكي يا فلفلة خلاص بقيتي لوحدك محدش هيجي يساعدك . فلفل خلاص نسيكي دلوقتي انا هكلك .
فلفلـة: لا فلفل مش ناسيني فلفل وعدني ان مهما حصل هيبقي معايا مش هيسبني .
الدودة : امال هو فين دلوقتي يعني ماجاش ولا حتي سأل عليكي هاها مش معقولة فلفل هينزل ويسيب الشجرة الجميلة علشان فلفلة اللي ما سمعتشي كلامه انسي انسي يا فلفلة . ويالة بقي ما تتعبنيش معاكي .
فلفـل : ابعدى ايدك عنها يا دودة أوعى تلمسيها أو تزعليها أنا نزلت مخصوص علشانها علشان أحميها منك سبيها هي وخديني أنا .
الدودة : اية دا فلفل أنت نزلت ازاى من علي الشجرة ! وتنزل علشان مين علشان فلفلة اللي ما سمعتشي الكلام , لفلفة اللي سبتك ونزلت من الشجرة وماسمعتشي نصحتك ليها , وكمان المرة دى مش هتقدر تعمل حاجة ليا أنت بقيت خلاص ضعيف بعد ما نزلت من الشجرة بتاعتك يعني ممكن أكلك وأكلها هي كمان .
فلفـل : أنا موافق خديني أنا وسبيها هي علشان ما تتعبشي .
الدودة : أنت بتعمل دا كله ليه وعلشان مين دى سابتك , لسة برضة بتحبها ونازل مخصوص علشان تفديها .

( 4 )

فلفـل : أنا وعد فلفلة ولازم انفذ وعدى ليها بس انتي عمرك منفذتي وعد ليكي وطول عمرك بتضحكي علي اللي بحبهم لحد ما توقيعهم وتخليهم يبعدوا عني وبعد كده لما يحسوا باللي عملوة مش صح بيندموا .
الدودة : بس فلفلة هي اللي اختارت طريقها يبقي لازم تستحمل اللي يحصلها وكمان مش كل مااستني حد ينزل من علي الشجرة تيجي أنت وتنقذه وتدافع عنه وفي الأخر تسامحة .
فلفلـة: معقولة معقولة اللي أنا شيفاه وسمعاه دا فلفل نزل مخصوص عشاني علشاني أنا بس أنا مااستهلشي كل دا , صحيح فلفل وعدني بس هو ملهوش ذنب انه يموت مكاني مالهوش ذنب انه يفديني أنا أنا مااستهلشي .
فلفـل : مفيش غير حل واحد بس علشان ابعد الدودة خالص عن اللي بحبهم طول حياتهم هناك
في شجرة الورد اللي مليانة شوك هروح ادخل فيها . صحيح أنا هتوجع وهنزل دم بس
كل دا علشان خاطر افدى حبيتي فلفلة لانها غالية عليا .
فلفلـة: لا فلفل انتي مالكشي ذنب أن المفروض اني أموت مكانك تيجي أنت تنزل مخصوص علشاني وتدخل في الشوك مكاني وتتعب وتتألم أنا مااستاهلشي دا كله .
الدودة : صحيح أنا مستغربة من اللي شفاه دا كان المفروض فلفلة تحافظ علي كلامك , شوف أنت تعمل علشانها اية وهي عملت فيك أنت اية انت بتفديها وهي سابتك وسمعت كلامي مكانك حقيقي دى حاجة تحير بصحيح .
الشوكة : اية اللي بيحصل دا فلفل نزل وكمان شوكي هيدخل فيه لا أنا مش موافقة . هو مالهوش ذنب دا بري ما عملشي اى حاجة مش صح .
فلفـل : لازم تسبيني أدخل فيكي ياشوكة علشان انقذ فلفلة حبيبتي من ايد الدودة وأخليها دايما مرفوعة الراس . اة اة
الدودة : هاهاها اتالمت اتعورت والشوك دخل فيك دا أنت بقيت ضعيف ياعيني هاها دلوقتي هاكلك واحد واحدة افتكرتك هتقذ فلفلتك ودلوقتي مش عارف تنقذ نفسك هاها .
فلفلـة: ليه كده بس يا فلفل تعمل في نفسك كده ليه يارتني كنت سمعت كلامك من الأول
ماكانشي حصل كل دا أنا السبب أنا اللي خليت الشوك يدخل فيك بسببى اتعورت
واتالمت وخليت الدودة تضحك عليا, أنا اللي استاهل اة ياحبيبي سامحني .
الدودة : دلوقتي بقي جه الوقت علشان اهزمك وأكلك أخيراً جه اليوم اللي تبقي فيه ضعيف قدامي مش عارف تعمل حاجة فيه هاها هم المم .
فلفلـة: اية دا معقولة خلاص كده الدودة هتأكل فلفل ويسبني لوحدى لا فلفل وعدني هيبقي معايا طول عمري اة اة ياحبيبي .
الدودة : هم هم كح كح اية دا اة اة اية اللي حصل دا معقولة بطني اة اة انت عملت اية يا فلفل تاني فيا معقولة هتكسبني تاني افتكرت خلاص اني كسبتك .
فلفـل : افتكرتيني يادودة انهزمت افتكرتيني ضعيف أنا عملت دا كله واستحملت دا كله علشان فلفلة حبيبتي لما الشوك دخل فيا انجرحت ونزل مني الدم صحيح اتالمت بس مش مهم طعمي بقي مشطشط, علشان اللي يقرب مني هيشفني وأنا قوى ودلوقتي انتي مالكيش مكان هنا في وسطنا اتحكم عليكي أنك تتحبسي في الأرض وتبعدى للنهاية عن اللي بحبهم وأوعي تفكرى تضحكي عليهم ممن تاني .
( 5 )

فلفلـة: أنا فرحانة أوى يا فلفل لانك موجود دلوقتي معانا بس يا تري يا فلفل أنا ليا مكان
علي الشجرة من تاني ولا خلاص علشان وقعت مرة مش هطلع تاني ؟
فلفـل : مين اللي قال كده أنا عملت دا كله لمين مش ليكي أنا استحملت الالم والتعب مش علشانك يبقي انتي مش موجودة علي الشجرة وبس لا أنت كمان جوة قلبي , يالا بينا نطلع من تاني وتعيش من جديد ونبدا صفحة جديدة فوق الشجرة .
فلفلـة: فلفل أنا بحبك لانك الوحيد اللي نزلت ودافعت عني وفدتتني بدمك علشان كده أنا مش هقولك يا فلفل من تاني أنا هقولك يا" فادى ."
فلفـل : وأنا هسميكي اسم جديد هناديكي" مفدية" علشان هفضل افديكي طول عمري .
الراوى : وعاشت مفدية مع الفادى في سعادة وحب طول العمر لانها اتعلمت الدرس اللي بيبقا مع الفادى علي طول هو اللي كسبان يفضل دائما مبسوط وفرحان مش قلقان أو خايف أو حزين دائما بيضحك وحاسس بالسلام وبالحب من اللي حواليه ويارب احنا كمان ياأولاد نكون اتعلمنا من القصة شئ جديد وجميل بمناسبة نزول الفادى لارضنا وصلبه علي الصليب من أجلنا علشان يمسحلنا غلطاتنا وكمان لما مات علشنا علي الصليب وأخيراً لما قام من بين الأموات لان أبواب الموت لن تقوى عليه ..

اخرستوس انستي .... اليثوس انستي المسيح قام بالحقيقة .... بالحقيقة قام

نانسى ديفيد 1
ملاك جديد
ملاك جديد

عدد المساهمات : 10
تاريخ التسجيل : 27/04/2010

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى