اسكتش لعيد الام ( انا عندى 3 ام )

استعرض الموضوع السابق استعرض الموضوع التالي اذهب الى الأسفل

اسكتش لعيد الام ( انا عندى 3 ام )

مُساهمة  نانسى ديفيد 1 في الخميس أبريل 29, 2010 1:08 pm

رسالة حب وفرح وتقدير بقدمها الى امى الحبيبة لا انا عندى 3 ام مش ام واحد ة, دى فقرة طقسيا ممكن تقدمها للاطفال بمناسبة عيد الام بالطريقة اللى تناسب كنيستك يارب تستفادوا منها :
نونتى : صباح الخير باربى
باربى : صباح النور نونتى
نونتى : الله اية اللى فى ايديكى دا ياباربى
باربى : اللى فى ايدى دا هدية لمامتى حبيبتى ماعيد الام بكرة
نونتى : اة مانا عارفة بس انا اشطر منك , انا جبت 3 هدايا
باربى : لية بقى مش انت عندك ام واحدة زيى
نونتى : لا انا عندى 3 ام
باربى : ازاى انا عندى ام واحدة بس اشمعنى انتى عندك 3 ام ياترى هما مين ؟
نونتى : وانتى كمان عندك 3 ام ياباربى . الاولى : امنا العدراء , والتانية : امنا اللى ولدتتنا , امى الثالثة : امنا الكنيسة .

باربى : ادة الكنيسة امى زى مامامتى اللى فى البيت امى
نونتى : اة طبعا وزى مامامتك اللى فى البيت بتعملك , الكنيسة كمان بتعملك
باربى : انا اعرف مامتى اللى فى البيت بتعملى اية , مامتى بتاعتى حبيبتى هى اللى شالتنى جوة بطنها 9 شهور وولدتتنى
نونتى : مامتنا الكنيسة بتولدنا من جرن المعمودية لما ابونا بيعمدنا جواها
باربى : ادة هو احنا بنتولد مرتين ؟
نونتى : ايوة بتولدنا الكنيسة من جرن المعمودية لما ابونا بيعمدنا وبيغطسنا 3 مرات , وبيرشمنا بزيت الميرون 36 رشمة

باربى : كمان مامتى بتاكلنى وبتعتنى بيا , وبتشربنى وبتغذينى علشان تخلى صحتى كويسة علطول ودائما بتختارلى الاكل المناسب ليا ولصحتى ولجسمى
مامتى الكنيسة بتهتم بيا ازاى ؟
نونتى : الكنيسة امنا بتغذينا هى كمان بس بتغذينا روحيا من جسد ودم المسيح فى التناول , ودا بيخلينا نثبت فى المسيح والمسيح يثبت فينا , وبتساعدنا دائما انى اعرف ربنا وبتخلينى اتكلم معاة , واعرف محبتة ليا من خلال القداس
باربى : الله دى مامتى الكنيسة حلوة اوى لانها بتهتم بحياتى مع ربنا , ومامتى التانية بتهتم بجسمى

نونتى : فاكرة ياباربى لما كنتى عيانة ماما عملتلك اية ؟
باربى : مامتى اللى فى البيت كانت سهرانة عليا طول الليل وبتدينى الادوية فى مواعيدها وكانت خايفة عليا اوى
نونتى : كمان مامتنا الكنيسة بتصللنا لما بنكون عيانين , فى القداس وفى حاجة اسمها اوشية المرضى وكمان ابونا بيصلى للمريض سرمسحة المرضى ( عرفاها ياباربى )
باربى : اة احنا خدناها فى المهرجان مش دى اللى ابونا بيولع فيها 7 شمعات ب 7 صلوات , انا كنت شاطرة فى المهرجان اوى .

نونتى : انتى لما بتقعدى تلعبى كتير ياباربى بيحصل لهدومك ولجسمك اية ؟
باربى : هدومى وجسمى طبعا بيبقوا مش نضفين من كتر التراب والعرق بعد اللعب
نونتى : طيب مامتك اللى فى البيت بتعمل اية لما بتشوفك كدة ؟
باربى : كنت بفتكر انها هتزعقلى وتزعل منى , لقيتها كلمتنى بالراحة واعدتت تفهمنى انى لازم اكون نضيفة دائما وبعد كدة اخدتت هدومى وغسلتها بالسافو كويس لحد مانضفتها , وخدتتنى تحمينى بالشامبو , علشان ابقى جميلة وامورة ونضيفة

نونتى : برافو باربى , امنا الكنيسة هى كمان كدة كل مابنعمل حاجة لا تليق بنروح لابونا نعترف بغلطنا يعلمنا ويفهمنا فربنا يسامحنا لما نعترف وابونا بيدينا الحل , ويرجع تانى قلبنا ابيض نقى بعد ماكان مليان نقط مش حلوة
باربى : الله كل دا بتعملة لينا امنا اللى فى البيت وامنا الكنيسة طيب امنا الثالثة العدراء ياترى بتعملنا اية ؟

نونتى : امنا العدراء امنا كلنا وشفاعتها لينا دائما قدام ابنها يسوع المسيح , تطلب من اجلنا حاجات كتير ( انتى عارفة ياباربى انها ليها اسماء كتير غير ام النور والعدراء

باربى : طبعا مش هى امى انا كمان ساعات بقولها ياعدراء , ام النور , يام يسوع , والكنيسة بتسميها ام الخلاص , والدة الالة , وهى امنا اللى بتتشفع من اجلنا كلنا
بجد انا دلوقت عرفت اننا كلنا لينا 3 ام وحقهم علينا نجبلهم 3 هدايا ودا يبقى كمان شى قليل عليهم , هما يستهلوا الاكثر ..........
___________________________________________________________________

التجهيزات :

عمل رسومات توضح كل مرحلة المرحلة الاولى شكل منزل وشكل كنيسة وصورة لماما العدراء

المرحلة التانية : صورة امراة حامل مرسومة او تصوير , وصورة جرن معمودية

المرحلة التالتة : شكل طبق ومعلقة , كاس وماستير وصينية الجسد

المرحلة الرابعة : شكل شريط دواء , طبق فية 7 شمعات

المرحلة الخامسة : صورة تيشرت نصفة نظيف ونصفة الاخر غير نظيف , وقلب نصفة ابيض والاخر منقط نقط سوداء او تجربة علمية عن الاعتراف بديلة للصور فى المرحلة الاخيرة ( احضار قطعة قماشة بيضاء وصبغة يود وبكربونات صوديوم

نانسى ديفيد 1
ملاك جديد
ملاك جديد

عدد المساهمات : 10
تاريخ التسجيل : 27/04/2010

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى